الزواج.. الزواج.. الزواج
بعتبر الزواج هو أخطر مرحلة بحياة الإنسان، لإنه يعني أسرة، ويعني مسؤولية، ويعني مشاركة، ويعني أطفال، ويعني التزام ويعني ويعني ويعني....
مش عارفة ليه الناس مستسهلة موضوع الزواج لهالدرجة!
الزواج مش بس بنت وشب يلبسوا دبل، مش يعني حفلة ورقصة سلو على أغنية "ع بالي حبيبي" لأليسا، مش يعني عروس وعريس، مش يعني "هاني مون" على شرم الشيخ أو تركيا مش شبكة ومهر وشقة وسيارة.. الزواج أخطر وأعظم وأهم من هيك بكتيير، كل هاي القصص خلال أسبوع أو أسبوعين بتنتهي، وببلش الحكي الجد، بتبلش توعى إنو عليك مسؤوليات وفي بيت مفتوح ولازمه مصاريف، وفي أطفال عالطريق، وفي مناسبات اجتماعية لازم تشارك فيها، وفي وفي في..! وللأسف في كتير بنات بفكروا الزواج عبارة عن مسلسل تركي وحب مدى الحياة ودلع وسفر وورد أحمر وأصفر وأكل من برا ووو... وفي كتير شباب كمان بفكروا الزواج دلع وهنا وإنو الزواج هو نهاية المطاف وما في مسؤوليات بعده!
ناسيين إنو الأصل في الزواج هو التشارك، زواج من زوج يعني اتنين! تشارك بكل شي، بالأفكار وبالعقول واحترام الطرف الآخر وتقدير اهتماماته، نزعل ونفرح سوا، ننام وننقوم سوا، ناكل ونشرب سوا، نربي الأولاد سوا، نعيش الحياة بكل تفاصيلها سوا.
ومع زيادة معدلات الطلاق بعالمنا العربي، بتسأل حالك، شو السبب؟ شو ذنب الأطفال يتبهدلوا بين أمهم وأبوهم؟ زواجات ما صار عليها 3 سنين أو أقل وانتهت بالطلاق؟ خطوبات طويلة وزواج قصير؟ شو السبب؟
بتهيألي إنو السبب أو –على الأقل واحد من الأسباب- زي ما كتبت فوق، كل واحد شايف تصور مختلف عن الزواج والحياة. هي بيجيلها عريس –كامل مكمل- شقة وسيارة ومصاري، هو شافها وعجبته، وقبل ما يتحاوروا ويتناقشوا ويفهموا أفكار بعض وشو توجهاتهم ونفسياتهم. وإلخ إلخ.. تلاقي الكتاب انكتب والعقد توّثق واتسجل، وبعد شهر تم الزواج وانتهت "الهيصة" وبلّش الجد وبلّشت الحياة، واكتشفوا إنو كل واحد فيهم في واد، ما في نقاط مشركة، ما في طريق للحوار، ما في أي محاولة لفهم الآخر.. وهوب طلاااق!
وكمان شغلة وهي الأهم، إنو مجتمعنا البائس إللي لساته عايش بعقلية العصور الوسطى، بضغط على البنت وصلت لعمر 25-30 وهي لسا ما اتجوزت، وكأن الزواج قبل 25 إنجاز تستحق عليه جائزة نوبل! المهم، الأهل والمجتمع بضلهم يضغطوا عالبنت لحد ما تتضطر توافق على الزواج من شخص هي مش طايقيته عشان تصير متزوجة والسلام! مش عارفين إنو بضغطهم ممكن يدمروا حياتها وحياته وحياة أسرة مستقبلية. وبالنسبة إلهم البنت إللي ما اتزوجت هي فاشلة لو إنها طلعت على المريخ أو اكتشفت أطلنطس المفقودة أو حصلت على 99 شهادة دكتوراه و150 ماجستير 356 بكالوريوس! وبضلهم يحشوا براسها من وهي صغيرة إنو الزواج هو الحياة وما في حياة من غير زواج، والمتزوجة هي السعيدة والعازبة لازم تحرق حالها وتموت!
تخلّف تخلّف تخلّف!
لو ما كان الزواج عن كامل قناعة من الطرفين وكامل تفاهم وكامل احترام وكامل تقدير وكامل محبة وكامل وعي وكامل إدراك وكامل توافق فكري مش حينفع!
والكتاب صحيح كوميدي وفيه سخرية وضحك، بس طريقة "السُعار" على العريس مقززة جدًا! ومستفزة جدًا! ومبالغات و"أفورات" كتير ما كان إلها لزوم. وأنا ما بحب أقرأ كتاب من أوله لآخره بالعامية.
وأنا كتبت إللي كتبته بالعامية لإنها شبه فضفضة مش مراجعة.
خلص تعبت وأنا بكتب وبرضو ما خلصت كل اللي بدي أحكيه.
